بسم الله الرحمن الرحيم
على الساحة دلوقتي بقت في أفلام كثير من نوعية الخيال أو الفانتازيا سميها زي ما تسميها، كنت فاكرة بما أن العالم أصبح يستخدم الطرق المباشرة بشكل كبير في التعاملات الإنسانية، أن الأفلام هي كمان هتبقي مباشرة زيه بس اللي حصل العكس تماما وهو أن كلما يبقى العالم أكثر مباشرة في طريقته كلما الأفلام اللي تعبر عنه تبقي غرقانه لشوشتها في الخيال.
في الأول الموضوع كان غريب إزاي ده حصل؟ لكن بعد كده اتضح أن كل ما بقت الأوضاع أكثر مباشرة كل ما اذا فكرت أنك تقول جملة أو حتى كلمة تتفهم بكذا معني، ممكن تتأخذ بسوء ظن ويتم اختيار معنى واحد بس لها في كل الأحوال وهو المعني السيئ وبالمقابل حتتحمل كون العالم مبقاش عنده إستعداد أنه يفهمك لكنه عنده كل الاستعداد عشان يحكم عليك.
وهي دي نتيجة المباشرة الزيادة في التعامل، وصلتنا أننا نحكم على بعض بمنتهى السوء من غير ما ندي لغيرنا فرصة يشرح فيها نفسه، ووارد جدا نطلع غلطانين في نظرتنا إلي الآخر لكننا نفضل أننا نوصل للاستنتاج الخاص بنا و نحكم على الآخرين بشكل مباشر حتى لو كان حكم غلط، وده السبب الرئيسي اللي خلي أغلب الافلام متتكلمش إلا بلغة الخيال.
الفن أساسه الإبداع وأما يعرف المبدع أنه إذا ما قرر أنه يوصل رسالته زي ما هي هيجي اللي يتحكم في الأمر ويفسره زي ما هو عايز حسب هواه ويحوله من فن إلى إنحراف أو فساد بس علشان يمنع انتشار الإبداع في عالم بقي غرقان في القبح والواقعية المفرطة ساعتها يفكر ألف مرة قبل ما يعبر عن فكره.
صحيح أن في ناس فعلا ترتكب جرائم انحراف وفساد بإسم الابداع، مستغلين حرية الإبداع أسوأ استغلال، بس المضحك أن الناس دي آخر ناس تتحاسب أو حتى يتم الحكم عليها فضلا عن التحكم في ما تقدمه، بل العكس ما يحدث فهم يعرفون من أين تؤكل الكتف.
وبما أن الهدف هو القبح ومنع انتشار الجمال خاصة عندما يكون في الخيال اللي متقدرش تحط عليه قيود، فسهل وقتها أنك تسوء صورته علشان ترجمه بالحجارة وسايب المجرم الحقيقي سارح في الأرض ينشر الفساد في كل مكان بالضلال، ما هو أما يكون الحق باطل يكون الباطل حق.
أفلام الخيال بتدي إشارة أن الناس مش عارفة تتنفس أو تعبر عن رأيها وخايفة إذا عبرت عنه يتم ايقافها فتضطر تلجأ للخيال علشان تقول اللي هي عايزاه بالمتغطي وأما تيجي تسألهم يقولوا إن ده مش المعني المقصود وأنكم فهمتونا غلط، شوف الوضع وصل لحد فين أنهم يسلكوا نفس طريق المفسدين ينكروا الحقيقة وينصروا الكذب.
وأحب أقولك أما تيجي تتفرج علي فيلم خيال مرة تانية فكر أن الموضوع له جانب تاني مظلم متفكرش بس أن قد إيه الانسان قادر يتخيل ويصنع عالم من الخيال مش موجود على الواقع فعلا لكن فكر أنه ممكن جدا ميكونش قدر أن يعمله في الواقع فقرر يعمله في الخيال حيث الحرية دون قيود.
تعليقات
إرسال تعليق
يسعدني أن تضع تعليقك هنا حتي أسمع صوتك بحق