قولي إزاي

بسم الله الرحمن الرحيم

تتصرف إزاي إذا جيت تحكى لغيرك عن مشكلة مضايقاك، فبدل ما يهتم بك يقوم مزود همك همين بأنه تقعد يلومك عمال علي بطال، أساسا الواحد مش قادر يصدق إزاي تبقي في عز المشكلة وشغالين اتهامات في بعضنا ونرمي المسئولية على غيرنا وناسين أن المشكلة موجودة لسه متحلتش وكل وقت يمر في صراع يزيد الوضع سوء.

إزاي بقي كل همنا أننا نتهم بعض ومش واخدين بالنا أن المشكلة أما تحصل بيعم أثرها على الكل، وإزاي في ناس عندها قسوة قلب أنها تقول مش مهم يحصل ليا إيه طالما مش أكون لوحدي يعني معندكش مشكلة تتسبب لنفسك في الأذي طالما في ناس كثير غيرك يتأذوا معاك، بس خليك فاكر كونك موافق علي الوضع ده فأنت تعتبر مسئول عن الأذى اللي سببته ليك و لغيرك كمان.

ليه محدش عايز يتحمل دوره في المسؤولية؟ ليه سهل نرمي علي بعض لكن صعب على الواحد انه يعترف بدوره في حدوث المشكلة؟ عارف ليه لأننا معندناش مشكلة نبقي كلنا سلبيين لكن أم يجي واحد ويحاول يبقى إيجابي نشيله الليلة كلها ونقوله مش انت عايز تبقي إيجابي اشرب بقي.

كلامي ده مش عذر لأي شخص يعمل كده، ده محاولة لشرح الاسباب اللي تخلي الناس تهرب من مواجهة ما فعلته، سهل عندها ترمي علي غيرها مع أن ده مش حيحل المشكلة إن مكنش يعقدها، لكن مش مهم عندهم، المهم أنهم يطلعوا من الموضوع من غير أي خسائر حتى إن طال الأمر أن يخرسوا الأفواه بالعافية.

المضحك بقي أن نفس الناس اللي هربت وسبتك في المشكلة وحدك هي نفس الناس اللي بتجري عليك أول ما تلاقي الحل وتنفذه لوحدك بس عشان يظهروا في الصورة، وتكتشف فجأة أنهم كانوا مهمومين كذبا بحل المشكلة، ممكن يدعوا أن الحل ده حصل بالمجهودات المشتركة لهم معاك، ومش بعيد يمدحوا فيك علشان ينسوك أي غدر حصل منهم.

للسبب ده أسالك يا اللي سامعني قولي إزاي تتصرف أما تلاقي كل ده بيحصل؟ وإذا قلت أنك تمنع الناس دول من الرجوع مش حيجيب منعك ليهم إلا الوش، وإذا قلت أنك تجبرهم على المساعدة اقولك برده مينفعش، لأن المساعدة لازم تكون نابعة من داخلهم، وإذا انتظرت حدوث ذلك قد لا يحدث مطلقا فلا يجب أن أعول على هذا الأمر.

عامة كل اللي قدرت أعمله أني عبرت عن فكري والموضوع متروك للجميع لإبداء الرأي في حل هذه المشكلة.