ليه كلمة أنا مش بتاع مشاكل تبقي لبعض الناس زي الراية الحمراء اللي يحطها المصارع قدام الثور في مصارعة الثيران، وكأنك تقولهم تعالوا اتخانقوا معايا، وأنك واحد ضعيف متعرفش تحمي نفسك علشان كده عايز أنهم يبعدوا عنك وبدون مشاكل، ومش عايزهم يعرفوا عنك أي حاجة لأنك مش جاهز أنك تتكلم عن حياتك، ومش واثق أن اللي ممكن تشاركهم به عن نفسك هيعجبهم أو مش هيخليهم ينقلبوا ضدك بعدها.
اتربينا طول عمرنا أن المشاكل حاجة وحشة وتبقي عيبة كبيرة أن يتقال علينا ناس بتوع مشاكل، لكن أوقات خوفك من أنك تطلع عليك السمعة دي تخليك تتحول للعكس انسان جبان مكسور ضعيف الشخصية كل دوره أنه يتجنب المشاكل ويبعد عنها بالمشوار حتى إذا كان التمن كرامته والتنازل عن حقه ونظرة الناس السيئة ليه.
عارف
أنت تعمل كده ليه علشان عايز الناس ترضى عنك حتى لو كان على حساب أنك تخسر
نفسك، تدور على المكاسب اللى ح تاخدها من وراء أفعالك دي أكثر من الخسائر
اللي بتحصل من وراء تجنبك لمشاعرك وأفكارك وكل اللي يعبر عنك، وده بيرجع لأنك خايف بشدة من شئ لسه محصلش ويمكن ميحصلش خالص.
مينفعش تتحول من النقيض إلي النقيض بس علشان وهم في دماغك، أقعد مع نفسك وفكر ايه اللي مخليك خايف للدرجة دي، وهتلاقي أن عندك مشكلة موجودة من مدة وبما أنك مش عارف أو قررت تتجاهلها هي قررت تعرفك بها على طريقتها، ومن الواضح أن خوفك هو عرض لمشكلة أكبر. حاول تراجع حساباتك مرة تانية أكيد حتلاقي شيء يفيدك في التعامل مع مشكلتك والأهم أنك تعرف نفسك بجد.
تعليقات
إرسال تعليق
يسعدني أن تضع تعليقك هنا حتي أسمع صوتك بحق