الكتابة حسب الطلب

بسم الله الرحمن الرحيم

أنا بأكتب من حوالي عشرين سنة وأكثر دون مشاركة كتاباتي مع الآخرين، ده مش مطلع رواية خالص دي حقيقة طوال هذه المدة كنت أكتب خواطر، يوميات، مذكرات، مواقف بتحصلي وبتكلم عنها لكن ما كان عندي الشجاعة أن أشارك حد في ما أكتب. الموضوع كان صعب فعلا، ما هو مش سهل نفسك تظهر على الورق لأن الكتابة ساعات بتقول عنك اللي متعرفهوش عن نفسك واذا عرفته أبدا ما حتقولوه. واللي بيحب الكتابة عارف كده كويس أنها عنيدة محتاجة مُحايلة كثير، خاصة أما تقنع الإلهام أن يزورك ويزودك بالأفكار التي تحولها إلى كلمات على الورق.

أما أشوف النهاردة كتابات موجودة بس عشان الناس بتحب تقرأ ده، أو أصل هو ده اللي بيتباع، أو أن البنات لازم تقرأ قصص عاطفية وكأنهم ميعرفوش يقرأوا حاجة تانية، والشباب نكلمهم عن كرة القدم والسيارات ناهيك عن أخبار المشاهير بل قل فضائحهم. تصور أما يعجب حد مقال أو محتوى مكتوب عن فضيحة، في حد بيحب الفضيحة! وللأسف الاجابة آه في ناس بتحب الفضيحة لغيرها لكن تكرهها لنفسها، ما هو حسب هذا الفكر السوء أنا لما أبقي وحِش في نظرك تلقائيا تبقي أنت كويس.

وخلينا نرجع لموضوعنا هل على الكتابة أن تكون حسب الطلب؟ يعني أن تكتب على مزاج الناس، خلينا في البداية نؤكد على أنه مش قاعدة أنك تكتب اللي يعوزوه الناس علشان تكتب عكسه، لكن القاعدة أنك تكتب كلام صادق من قلبك مقتنع بيه وقادر على تحمل مسئوليته، أفكارك حرة، جرئ في طرحك لها، هدفك أنك توضح الصورة من جميع جوانبها وتسيب الحكم والقرار في يد القارئ وهو حر في اختيار قراره لأنه من سيتحمل النتيجة.

وما سبق عكس المعروف بالكتابة حسب الطلب اللي قواعدها مثل أن تكتب الذي يثير فضول الناس ويخليهم متابعين لهذا الموقع أو الجريدة ومش مهم يكون حقيقي المهم يزيد عدد القراء، وعادي أنك تحول القارئ لشخص حِشري يتتبع عورات الناس و يتغذى على فضائحهم و حتى إن كان هيخسر نفسه في السكة.

المهم نقنعه أنه هيفوت نص عمره إذا مقراش الخبر ده، ومش مهم يتحول اللي بيكتبوا لغيلان تتعامل مع البشر على أنهم وحوش جائعة عايزة غذاء مستمر أي كان بأي شكل وأي طريقة وتقع عليهم مسؤولية تدميرهم لعقول الناس أمام القانون وأمام "الله" اللي حيحاسبهم عن كل كلمة كتبوها كان هدفهم منها إيه؟ وقرأها الناس ازاي؟ وأما شافوا الغلط اللي بيحصل اتصرفوا معاه ازاي؟

الكتابة حسب الطلب معناها أننا فقدنا انسانيتنا وبقينا مجانين هذا العصر، اللي الجنون طال فيه كل شئ حتى الكتابة، إذا كنت مُصر تكتب حسب الطلب يبقي أكتب حسب ما يطلب منك قلبك اللي يدلك علي الطريق السليم أو حسب ما يقولك عقلك اللي عايز يوصل معلومة صحيحة للناس وأعرف أنه على حسب ما تطلب على حسب ما تلاقي، علشان كده فكر كويس قبل ما تطلب.