صورك القديمة

بسم الله الرحمن الرحيم

 

معرفش ليه الناس مبتحبش صورها القديمة وعايزة بس صورها الجديدة مع إنهم نفس الأشخاص في الحالتين وكأن الانسان لازم يكون بشكل معين علشان يكون هو خصوصا في نظر الناس، الصور القديمة مهما كانت بتعبر عنك وعن المرحلة اللي كنت عايش فيها والمواقف والناس أي كانوا، فإذا كانت الصورة الجديدة صورة جميلة حقيقية غير مزيفة فده لأن الصور القديمة كانت حقيقية ووصلتك للمستوي اللي انت فيه الآن.

صحيح مش سهل علي الواحد أنه يعترف بصورة خاصة بوجود بعض الناس سليطة اللسان ذوي النقد اللاذع، بس مش ممكن يكون ده أكثر قسوة من أنك تتخلى عن نفسك وتقص فترة معينة من حياتك علشان تثبت للي حواليك أنك كده طوال الوقت.

أقولك حاجة محدش بيصدق، بس بيقولوا خلاص هو حر وبعدين دي فرصة أننا نلعب معاه أو بيه، بأننا كل شوية نفتش وراه ولأنه خايف من أن تنكشف صورته القديمة حيعمل أي حاجة علشان نبطل ندور وراه واحنا في الآخر المستفيدين، كل ده بس لأنك رافض تكون نفسك في كل الأحوال.

وسؤال هو أنت ضامن أنك مترجعش للي كنت فيه أبداً؟ في كل الأحوال أنت كنت هناك قبل كده وممكن ترجع تاني ويبقي سهل الرجوع، وحتى إذا كنت عملت كل حاجة علشان مترجعش لصورتك القديمة ونفترض انك نجحت لغاية إمتى حتظل تخفي نفسك؟ وإيه الثمن اللي هتدفعه علشان تظل محافظ علي صورتك الجديدة؟ واللي حيكون من أعصابك و نفسيتك وصحتك.

صدقني حتي لو مش حتكسب أي شئ من الاعتراف بصورتك القديمة كفاية إنك أنت أنت. كن نفسك و ميهمكش حد.