السهل وحِش

بسم الله الرحمن الرحيم

معرفش ليه في قاموس الناس السهل حاجة وحشة، زي مثلا لأ معملش الموضوع ده أصله سهل، إيه هو أي حد يأخذ كذا هو أنت فاكرها ساهلة، أنت عايز تأخذها بالساهل، ده حتي وصل الموضوع لتصنيف الناس لبعضهم متبقاش ساهل.

المضحك بقى إن الموضوع ده له وشين وش لينا، ووش علينا اللي بتاع الناس يعني أنت أما تحتاج الناس منك مساعدة عايزنها سهلة وتيجي بالساهل لكن إذا انقلب الموضوع وبقيت أنت اللي محتاج منهم مساعدة ساعتها تشوف الصعوبة علي حق.

مين اللي ادانا الحق أننا تسهلها علي أنفسنا و نصعبها على غيرنا، إذا كل واحد عمل كده تبقي مصيبة لأن ساعتها محدش حيساعد حد، لأن كل واحد حيصعب المساعدة على الثاني ويوم ما يجي يحتاج المساعدة حيرد له الآخر صعوبة بصعوبة ونكون مجتمع يتصارع بلا نهاية.

الشئ الطبيعي إن مش كل حاجة لا سهلة ولا صعبة، الدنيا دي فيها السهل والصعب سوا ووظيفتك بقي أنك تتعامل مع كل شئ بالطريقة المناسبة له.

ومتخافش إن الحاجة سهلة عليك، مش لازم تتعب في كل شئ بشكل كبير علشان الناس تصدق انك اجتهدت، مش معني أنك لقيت اللي يسهل عليك الطريق إنه كان واسطة لك ده " ربنا " (عز وجل) وضعه في طريقك لأنه عالم بالنوايا وعارف انك قاصد خير فبعت لك اللي يسهلك أمورك.

ونصيحة أوعي تصدق اللي يضحك عليك و يقنعك انك معملتش حاجة وأنها جات لك سهلة ده واحد كل مشكلته أنت مش المبدأ لأنه كان نفسه يبقي مكانك.

مبقولكش استسهل كل حاجة، بس كمان أما تلاقي الحاجة سهلة متكلكعهاش علشان بس تبان قوي قدام ناس، مش حيرضوا عنك في كل الأحوال.

ساعد نفسك بأنك توفر طاقتك للشئ اللي حقيقي صعب ويستحق جهد كبير منك.
وافتكر السهل مش دايما وحش ده أوقات كتير بيكون هو المحرك الرئيسي لأي فعل.