زيادة تركيز

بسم الله الرحمن الرحيم

في الفترة الأخيرة بقي عند أغلبنا زيادة التركيز في الحياة عموما، يمكن ده من كثر القهوة اللي بنشربها مؤخرا، أو يمكن لأننا مبقناش نعرف إزاي ولا أمتي انزاحت الستارة اللي كانت بينا وبين الناس ورؤيتنا ليهم علي حقيقتهم فجأة وكأنك تري العالم بعين ثانية.

وفي الحقيقة للتركيز ايجابياته وسلبياته يعني مثلا أنك دلوقتي بقيت أكثر من قبل تفهم مين بيقول إيه وإزاي وليه و تفكر ألف مرة قبل ما ترد عليه، وأنك ماتخدش بالكلام اللي يتقال قدامك بل بالكلام السري اللي مستخبي وراه. صحيح أنه خاب أملك في ناس كثير وده ساب جواك مرارة مش عارف تعالجها حتى الآن بس برده تعلمت أن مش أي وقت تعبر عن مشاعرك خصوصا أما متعرفش اللي بتكلمه شايل في قلبه إيه من ناحيتك.

الغريب في الموضوع أن زيادة التركيز دي تزود العزلة عندك لا وكمان تخليك تحبها معرفش إزاي؟ مبقاش يفرق معاك اللي بيحصل بره العالم بتاعك، ومبقتش تنخدع بسهولة وراء الحاجات البراقة المزيفة، بقي عندك ايمان كبير بأن كل شئ بيحصل لسبب وحكمة ومش لأنك مفهمتهاش أن ده معناه عدم وجودها، في حاجات كثير في الدنيا دي الواحد ميعرفش حاجة عنها أوقات بيكون ده ميزة أو عيب علي حسب الموقف والناس اللي حواليك.

بس خلي بالك، أوقات بتكون زيادة التركيز عاملة زي زيادة الكهرباء في الجسم يعني ممكن تموت وفي الحالة دي تموت برائتك، طيبتك، نقاءك، مراعاتك للآخرين أو تخلي عندك مرارة في التعامل معهم . الفكرة أن زيادة التركيز حتخلي وضع الحياة بالنسبة لك مختلف عشان كده أتأكد أنك قادر تتعامل معاه كويس في كل الأحوال.