حيرة القمر

بسم الله الرحمن الرحيم

ألا ترى أن القمر حيران كل يوم يطلع في السماء ويبقى محتار هو ليه هنا؟ عامل زي أميرة جميلة كل الناس بتبص لها من الخارج لكن محدش عارف هي من من الداخل!

وجرب تمشي في الشارع وتشوف إذا كانت الناس مهتمة بضوء القمر أو حتى تشوفه وهو فوق في السماء، عدد قليل جدا اللي بيفكر كده. بس في اوقات بيبقي فيها القمر مهم زي وقت ظهور هلال رمضان لأنه مناسبة دينية ويلعب القمر دور خطير فيها لأن ظهور الهلال من عدمه قد يتسبب في صيام بلدان وإفطار بلدان أخرى. وفي أوقات ثانية زي أما الواحد يكون رايق وحالم و رومانسي أو عايز يصفي باله بيشوف القمر.

لكن محدش مهتم بالقمر اللي لو كان انسان حيسأل نفسه كل يوم هو بيعمل هنا ايه؟ خصوصا في عز الأنواع المختلفة من الإضاءة الصناعية اللي مالية الدنيا، عارف أما حد يرفعك فوق عشان يسيبك هناك، يقنعك أنك عالي وكبير عشان بس تبعد عن ما يريده هو لنفسه فقط وأول ما تصدق وتعمل اللي قالك عليه وتبعد تكتشف أنه كان مقلب معمول فيك بس عشان تظل بعيد ما هو اللي زيك لازم يظل بعيد.

يا تري لو قرر القمر ينزل من برجه العالي حيعمل إيه في وسط الإضاءة العالية، يقرر يستني ويغير في الواقع، ولا المواقف والناس هتبقى أقوى منه وتدفعه بعيد في العالي وتقنعه بالوهم أن ده لمصلحته. محدش يعرف مصلحتك أكثر منك فكر كويس انت عايز تعمل ايه عشان نتيجة قرارك أنت اللي تتحملها وحدك.