سقوط الشهرة

بسم الله الرحمن الرحيم

الشهرة هي أنك تبقي معروف بالنسبة لعدد كبير من الناس لدرجة أنك أما تمشي في الشارع تعرفك الناس وتشاور عليك، ومن ساعة ما الناس إكتشفت شئ مكنش سر ولا حاجة، وهو أن أي حد ممكن يعمل أي حاجة عشان يبقي مشهور وأن مش بالضرورة أنك تحصل على الشهرة بالأخلاق، أوقات بيبقى العكس تماما هو اللي بيحصل، وفجأة أصبحت الشهرة مطلب جماهيري.

طب ليه كثير من الناس عايزة تبقى مشهورة، في اسباب كثيرة ممكن تخليهم يدوروا على الشهرة زي مثلا الحاجة للظهور، الحصول على الأهتمام وانك تبقي محبوب- متتصورش الواحد ممكن يعمل إيه عشان يشعر بالحب- أو يفتح أبواب المال، الرفاهية، علاقات مع ناس مهمين! متفرقش كتير الأسباب طالما حتتحمل النتيجة أي كانت.

بس تعرف أن الشهرة ممكن تبقي سلاح، أما يكون في شخص بيبدأ لسه يظهر ومقدرش المنافسين أنهم يبعدوه عن الساحة عشان تخلى لهم، يقوموا يعملوا العكس تماما بأنهم يشهروه بشكل كبير وإذا كان هو قادر يقاوم إغراءات الشهرة حيثبت وتبقى فترة وعدت، بس إذا كان لا مش حيستحمل ويقع، وقتها يقولوا شوفوا اللي كان تتحاكي بيه الناس طلعت أخرته إيه.

الشهرة مش حاجه وحشه بالعكس هي ليها مميزاتها زي ما ليها عيوبها، عارف يعني إيه أنه يبقي عندك عدد كبير من الناس يسمعون لك، أنك تقدر توجه لهم رسائل إيجابية أو سلبية في نفس الوقت وتساعد في تغيير حياة ناس كثير ده أفضل بمراحل من أنك تجعل شخص مشهور من أول وجديد برسائل جديدة.

الشهرة قوة للي يقدرها بس أنك تلاقي اللي يحبك ويبقى اكبر معجبيك ده أهم من الشهرة نفسها.