بسم الله الرحمن الرحيم
بلاش نصيحة، تعبنا من النصائح، النصيحة مش وحشة لكن كترها مؤذي، مش عيب أنك تسمع من غيرك، العيب أنك ساعات وأنت مش واخذ بالك تطبع أسلوبك في النصح بشيء من القوة علي طالب النصيحة، يحس بسيطرته عليه خصوصا لو كان الناصح عنده خبرات كثير في الحياة وقتها يبقى بيقول الكلام وكأنه أمر مسلم به ومهما يبان أنك أنت صاحب القرار هو يأثر عليك بالعافية.
أوقات النصيحة تمسح البصمة الشخصية للإنسان تخلي اللي يعطيك النصيحة عايزك تطبق النصيحة بتاعته وإلا هو يديك نصيحة ليه! لأنه في نظره طالما سمعت نصيحته يبقي لازم تأخذ بها، تلاقي ناس كثيرة تكلمك عن الحرية الشخصية وكل إنسان حر في قراراته بس ده كلام مفيش حاجة تثبته ولا تنفيه.
يمكن تزعل أنك تتعب نفسك في نصيحة حد وبعدين مياخدش بكلامك، تحس أنك ضيعت ووقت ومجهود علي الفاضي، بس مين اللي قال أن علشان حد طلب نصيحة منك يبقي لازم ينفذ كلامك؟ ده غير صحيح بالمرة، أنت محتاج تراجع نفسك وتعرف أنت بتقدم نصيحة للي يطلبها علي أي أساس، وإلا تبقي أنت كده مش بتساعد طالب النصيحة ده انت كده تضره من غير ما تاخد بالك.
كل انسان شايف نفسه من منظوره أنه الصح، ينظر للموضوع من اتجاه واحد فقط اتجاهه هو، حتى في النصيحة لمجرد أنك مررت بموقف ما وعانيت من مشاعر مؤلمة بسببه و( ربنا ) عز وجل أخرجك منه علي خير، تحول نفسك بسرعة لخبير في المواقف المشابهة وتعطي نصائح عمال علي بطال بل أن الموضوع يوصل عندك لدرجة أن محدش غيرك يعرف يعمل اللي تعمله، الصحيح أنك أنت أنت، شخص واحد وسط ناس كثير.
جمال النصيحة في أنها تعرف اللي طلبها أنه مش لوحده اللي مر بالموقف ده في ناس سبقته، وأنه يوم ما يطلب المساعدة من غيره هيلاقيها، أن من ينصحك واثق في قدرتك على اختيار القرار الصائب في الموقف الحالي، أنه حتى إذا لم يختر أن ينفذ نصيحتك فالمهم أنه سمعك ويتذكر كلامك وما لا ينفع في موقف حالي قد ينفع في موقف تالي، ولا أحد ينسى أنه جاء لشخص في وقت أزمة يستشيره في أمر ما ولم يبخل عليه بالمشورة وساعده بكل ما يستطيع.
تعليقات
إرسال تعليق
يسعدني أن تضع تعليقك هنا حتي أسمع صوتك بحق