كراكيب النفس

بسم الله الرحمن الرحيم

الكراكيب هي عبارة عن حاجات زائدة عن حاجة الإنسان ولا يستخدمها في العادة لكن يرفض رميها لأنه شايف أنه حيجي يوم ويستخدمها وممكن يجي اليوم ده أو ميجيش بس السؤال هو هل هتفضل الحاجة على حالها ينفع يستخدمها حتى هذا الوقت؟ ممكن يكون محتفظ بيها لأنه شايف إنها بتمثل له ذكرى مهمة مش قادر يفرط فيها ساعتها لازم يحدد أولوياته، مش كل حاجة هتبقى ذكرى وغالية كمان والأهم هل تستحق أنها تأخذ مساحة من حياتك ووقتك وطاقتك عشان تهتم بها؟ أوقات الواحد بيخلي الكراكيب استخسار وده أسوأ الأسباب لأنه لا منه بيستفيد بيها ولا عايز غيره يستفيد بيها، معندوش أي مشكلة انها تبوظ وتترمي ويعف عليها التراب وتحتل دنيته علي أنه يتبرع بها لغيره اللي ممكن جدا يكون محتاجها أكثر بكثير منه.

الكراكيب الحقيقية هي كراكيب النفس، لأن النفس أما تتملي بما هو زائد عن الحد، بتحوش جواها كراكيب، وكون النفس شيء غير مرئي بتضطر تخليك تحس بيها بأنك تحط كراكيبك في صورة أدوات ملموسة مادية واضحة قدام عينيك، لأنها عارفة أنك إذا بدأت تتخلص من الكراكيب دى يبقى انت مشيت في طريق إصلاح النفس.عشان كده أما تلاقي كراكيب كثيرة في بيتك وأنت تعودت علي رؤيتها ورغم كرهك لمنظرها كل ما تفكر تتخلص منها تلاقي مقاومة شديدة جوة نفسك أعرف إن عندك مشكلة، وإن زي ما استمرار وجود الكراكيب له خسائر تنظيفها له خسائر كمان، الفكرة كلها أنت بتقدر أنهي خسارة هي الأقل من ناحيتك.

ما هو مش معقول أنك تبدأ تتخلص من كراكيب بقالها سنين من غير ما تخسر تعب وجهد ووقت وطاقة وتحمل وصبر حتي تعيد بناء حياتك وتنظم أمورك بس النتيجة تستحق، عشان كده أبدأ ومتخافش ابدأ خطوة خطوة بالتدريج اهم حاجة الاستمرار وبعد ما تتخلص من كراكيبك هتشوف نفسك بعين تانية خالص.